De les promeses a los fechos
¡Hola, vecinos y vecinas!
¡Hola vecinos y vecines!
Seguro que lo escuchastis mil vegaes: que si la política va por mandatos, que si los tiempos son los que son… Pero quien vivimos equí, en L.lena, sabemos de sobra lo que ye esperar. Años, y dacuando décades, viendo cómo dellos proyectos queden nel caxón del "yá se fadrá".
Cuando empecé esta andadura como alcaldesa, tenía bien claro lo que nun quería: que L.lena siguiera siendo sinónimu d'espera. Y lo primero qu'atopamos foi con una llista de coses pendientes dende diba bien de tiempu. La más sangrante, ensin dulda, yera'l nuesu Centru de Salú. 30 años puxando por ello, más d'un cuartu de sieglu escuchando "agora nun toca". Paecía una batalla perdida.
Pero, ¿sabéis qué? Equí nun nos gusta rindinos. Punximos tol nuesu enfotu, aportunamos, superamos munches torgues… y a la fin, l'esfuerzu mereció la pena. Esi edificiu moderno y lluminoso qu'agora veis llenu de vida nun ye un suañu. Ye una realidá. Güei, tenemos l'atención que merecemos, nun espaciu dignu y calidable.
L.lena nel mapa
Porque cuando damos la nuesa palabra, faemos tolo posible pa cumplila. Amuesa tamién d'ello ye que, tres años de llucha, recuperamos el IBI del peaxe del Güerna. Un dineru que redunda en beneficiu de tolos ḷḷenizos y ye motivu pa sintise arguyosos.
L.lena yá nun ye esi sitio pol que se pasa de llargu. Agora somos protagonistes. Mirái l'Alta Velocidá, daqué que paecía tan alloñáu y que yá ye la nuesa puerta d'entrada al futuru. Un tren non solo conéctanos con Madrid, sinón que nos pon nel centru de too.
Y ello ensin escaecenos de los nuesos raigaños. El nuevu mercáu de ganáu que tamos poniendo en marcha ye'l nuesu granín d'arena pa curiar de los que curien de los nuesos paisaxes y de la nuesa xente. Porque en L.lena, lo de güei y lo de siempre van de la mano.
Ye por eso que tenemos qu'aprovechar tolos recursos de los que disponemos, como ye'l casu de la estación d'esquí. Cola implicación de toos, podría convertise nun gran motor económicu xenerador de riqueza pal nuesu conceyu.
Lo que de verdá nos importa ye que quedéis a vivir equí. Un conceyu non solo tien qu'ocupase del día ente día, tamién tien que mirar pel mañana. Y sé que lo que más vos esmolez, lo que más m'esmolez a mi, ye'l futuru de los nuesos mozos. Que nun se tengan que dir pa buscase la vida. L.lena ye un llugar ideal pa vivir: tranquilu, seguru, con bona calidá de vida. Pero fáltanos un emburrión: la vivienda.
Por eso, el mio compromisu pa los próximos años ye bien claro: vamos a por toes col arriendu algamadizu. Nun quiero que nengún mozu de L.lena tenga que faer la maleta porque equí nun atopa un techu. Quiero qu'esti sía'l vuesu llar, que forméis equí les vueses families, si ye lo que queréis.
Por y pa L.lena
Demostremos que, con ganes y trabayu n'equipu, lo imposible dexa de selo. Xestionemos cola cabeza, siempres cola única intención de construyir espacios meyores. Y consiguir gracies a la implicación de los y les trabayadores y les persones que formen l'equipu de Gobiernu local, bones persones y comprometíes col nuesu conceyu.
Y agora convídovos a que sigamos caminando xuntos, cola mesma ilusión, porque lo meyor pa L.lena nun ye lo que fiximos hasta güei, sinón tolo que nos queda por faer a partir de mañana.
Soi una más, una vecina que tien l'honor de ser la vuestra alcaldesa, y el mio únicu oxetivu ye, foi y va ser trabayar por y pa L.lena.