La escavación del Curucho documenta una torre defensiva del sieglu X frente a les campañes d’Almanzor
Les resultancies de la escavación arqueolóxica del Curucho de Reconcos, encarnada nel Proyectu Pintaius, documenta en L.lena una torre defensiva del sieglu X frente a les campañes de Almanzor. A finales del pasáu mes de febreru desenvolviéronse los trabayos nesta fortificación, catalogada como castru pol profesor J. M. González en 1956.
Por aciu la escavación d'un sondéu pervalible na zona cimera de la fortaleza, dirixíu por Alfonso Fanjul Peraza, los investigadores entienden dende'l primer día de trabayos que tán énte’l derrumbe d'una torre, y non énte un antiguu castru prerromanu. Magar los escasos restos de cerámica documentados apuntaben a una cronoloxía medieval, foi'l carbonu 14 el que determinó'l momentu d'usu de la torre. Según l'analís realizáu pel Centru de Ciencies Físiques y Tecnoloxía de Lituania, el Curucho tuvo ocupáu mientres bien poques décades, a partir del postreru cuartu del sieglu X.
La construcción de la torre del Curucho, defendida por un enorme foso escaváu na roca, realizóse nun momentu que coincide coles campañes d’Almanzor nel Reinu de Llión. Fanjul sostién que “tamos ante una defensa preventiva de les comunicaciones con Asturies”. L'antigua torre del Curucho controlaba'l puntu d'unión de toles víes naturales y caminos históricos que descendián de Llión hasta L.lena pol valle del Güerna.
Les campañes militares d’Almanzor (al-Mansur ibn Abi Amir) contra'l Reinu de Llión constitúin unu de los episodios más intensos de la guerra entre al-Ándalus y los reinos cristianos del norte nel sieglu X. Ente 977 y 1002, el caudiellu andalusí dirixió más de mediu centenar d'espediciones de saquéu sobro los territorios llioneses.
Nesti contestu, la torre del Curucho paez responder a una función defensiva puntual: una estructura d'ocupación curtia, venceyada a la tema de qu'estes incursiones travesaren el cordal hasta Uviéu y que tamién sirviera como puntu de control del pasu de persones y mercancíes.
El proyectu Pintaius, dirixíu por Jorge Oca y financiáu pol Conceyu de L.lena, pretende datar tolos pueblos fortificaos del valle del Güerna, cola cuenta de recuperar el patrimoniu históricu-turísticu venceyáu al orixe de Pintaius, un militar ástur-trasmontano del antiguu valle del Orna.
